أسماء محفوظ: ''مين اللي يقدر ساعة يحبس مصر''

قالت الناشطة السياسية أسماء محفوظ آن الآوان أن يسلم المجلس الأعلى للقوات المسلحة السلطة، لمدنيين، وأن يعود لثكناته للقيام بواجبه في حماية البلاد، بعد أن ثبت ببراهين الأحداث فشلهم في إدارة البلاد في المرحلة الماضية.
وتطرقت محفوظ في تصريحاتها إلى آداء التليفزيون المصري قائلة:'' الناس اللي بتصدق التلفزيون المصري واللي مصدقة ان اللي بيحصل اجندات خارجية .. هما نفس الناس اللي قعدو في بيوتهم وكانوا فرحانين لخطاب الرئيس.. نفس الناس اللي شتمو في الناس اللي في التحرير .. نفس الناس اللي بيقولو عايزين استقرار .. الناس اللي بتصدق التلفزيون المصري وبيقولوا انهم شاركوا في الثورة .. دول اللي نزلوا التحرير يحتفلوا بعد ما الاعتصام''.
وتابعت: '' خلاصة كلامي ده بقوله عشان متزعلوش من شتيمة وكره الناس فينا وفي الثورة عشان اللي بيشتموا دول هما اللي كانوا متضايقين انهم مش عارفين يروحوا السوبرماركت قبل سقوط مبارك.. انا مش ضد الناس دي ومش بلوم عليهم كمان, بس كلامي موجه للناس اللي نزلت التحرير من الاول وضحت بنفسها ولسة مكملة وبتضيع حياتها عشان تجيب الحق.. في ناس بقالها سنييين بتقف ضد مبارك والناس ياما متعرفش عنهم حاجة ياما بتقول عليهم فاضيين او مجانيين.. خلاصة الكلام ... نعمل الصح حتى لو اتشتمنا واتبهدلنا ولو من اقرب الناس لينا''.
ورأت أسماء أن :'' كل مرحلة بتعدي بتيجي الاصعب منها ... ويمكن الاخطر ... واحنا اقويا واستحملنا كتييير وان شاء الله هنعرف نستحمل اللي الجاي.. وبرغم اقتناعي ان الشارع اهم من النت ... بس لازم مننساش فضل تويتر والفيس واليوتيوب لما استخدمناه اداه لحشد وتنظيم الناس في مظاهرات كتيير.. لما نزلت التحرير يوم 18 يناير اهتف بسقوط مبارك الناس وقفت اتفرجت وقالت عليا مجنونة لحد ما الامن شدني وبعدني عن الميدان ومحدش حس بيا.. ولما عملت فيديو على النت يوميها .. فوجئت انه وصل لاااف المصريين وناس نزلته على الموبايلات وبعتوه لاصحابهم''.
واستكملت:'' صفحة كلنا خالد سعيد نجحت انها توصل صوتها لالاااف في الشارع في وقفات صامتة وسلمية كانت صداها قوي جدا.. الابتكار هو انكم تستخدمو اي اداه في ايديكم مهما كانت ضعيفة وتخلوها سلاح قوي في ايديكم.. ومتنسوش ان ابناء مبارك بيستخمو نفس السلاح دلوقتي عشان يشوهو صورتنا.. واحنا قدرنا نغلب مبارك والاعلام كله كان معاه .. دلوقتي معانا قناة او قناتين''.
وفي محاولة منها لإعادة إحياء روح الثورة:'' احنا في ايدينا كتييير اووي واحنا اقوى من مجلس مبارك ... بس بالله عليكم افتكرو ان سر قوتنا ايماننا بالقضية وايمانا اننا هنجح مهما طال الزمن .. متنسوش ان اول اضراب عام حصل في عهد مبارك 2008 كان بجروب على الفيس بوك وهز الداخلية وخلاها مرعوبة.. متسنوش ان اللي فضح تزوير الانتخابات في 2010 كانت المواطن الصحفي على الانترنت بتصوير من كاميرات موبايل.. متنسوش ان اول واحد وقف يفضح الداخلية وانتهاكتها كان وائل عباس بمدونته ايام مكنش حد يعرف يعني اي مدونة في مصر''.
واستطردت بالقول:'' وائل عباس مكنش بيتكلم في التلفزيون وكان بيتكلم على النت وقت ما كان عدد قليل اللي يبشوف النت ومع ذلك كان بيتهدد وبيتبهدل عشان بيفضحهم.. احمد ماهر اعتقل واتعذب عشان يديهم باسورد جروب 6 ابريل . عشان هما عارفيين قد ايه خطر عليهم.. مايكل نبيل شوفوا حصله ايه عشان كتب على مدونته تواطيء المجلس مع مبارك في الثورة.. وغيرهم كتيير لو زورتو الشبكة العربية لحقوق الانسان وهشام مبارك والمركز المصري او النديم هتعرفو قد ايه ناس اتبهدلت بسبب فضحهم للنظام على النت''.
وعبرت أسماء محفوظ عن رفضها لدعاوى بث اليأس وفقدان الأمل بقولها:'' اللي بيتكلمه عن فقدد الامل او الياس عشان يدوب نضال 8 شهور ... امال اللي بيناضلوا بقالهم سنين يقولو ايه؟.. شخصية زي كمال خليل عمره ما طلع في الاعلام ولا استخدم الانترنت ..لكن بطل بيناضل من سنيين ضد الفساد ومسبش مظلوم الا ووقف معاه وعمره ما يأس.. احنا نجحنا اننا نعدي من مرحلة لمرحلة .. لو شفتو الصورة من بعيد تعرفو قد ايه بنكسب لصالح مصر هانت خلاص خلونا نتماسك.. احنا نملك القوة ونملك الاخلاص .. ونملك الاصرار والتحدي ... واللي فينا هيقع الباقي هيسندوه وهنكمل''.
وأكدت محفوظ على أن :'' الثورة مستمرة.. فتنة ايه اللي تحصل في مصر؟؟ مين يقدر يعمل فتنة والمسلمين كانو بيحمو المسيحين وهما بيصلو في الميدان؟ والمسيحين كانو بيساعدونا نتوضى.. اللي شفناه في الميدان هي دي مصر ... مصر اللي كلنا بننسابق عشان نموت عشانها.. مينا وسيد بلال وخالد سعيد ممتوش .. دول هما الي بيخلو الثورة تعييش''.
وانهت محفوظ تصريحاتها بالقول :'' كانت اسوا حاجة في الميدان المنصة اللي كانت بتصحينا الساعة 5 ونص الصبح وتعمل ازعاج .. دلوقتي كلنا مفتقدينها.. وحشني الفول بالزيت الحار بتاع التحرير .. وعايزة اشرب شاي من التحرير.. ارتفاع روحنا المعنوية ده اقوى سلاح معانا .... وفي حروب الاستنزاف بيستخدمو كل الوسائل لقتل الروح المعنوية للخصم . يلا نهتف ونقولهم مش هيقدرو.. حرييييييييييييية.. علي وعلي وعلي الصوت .. اللي هيهتف مش هيمووت .. بكرة الكلمة تجيب مليوون والمليوون هيجيبو فروووعوون.. ميين اللي يقدر ساعة يحبس مصر''.

» أسماء محفوظ تتلقي صفعة من متظاهر قبطي
» القضاء العسكري يقرر إحالة أسماء محفوظ إلى المحكمة العسكرية
» أسماء محفوظ فردي عن دائرة مصرالجديدة ( مصرالجديدة - نزهة - بدر - الشروق)
» اللي كل البنات اللي شايفه انها جميله
» دوللى شاهين: ولا حدا يقدر يشوف الأندروير بتاعي